مستر مزاجي

من كام يوم على توتير طلعت براسي الفكرة … المزاجية أعيت من يدويها

هالمدونة لازم تكون بالعامية لأنو مزاجيتي بالهوقت هيك !

ما في أصعب من إني البني آدم يتعامل مع واحد مزاجي بحياتو , بشغلو , بدرسو , بجامعتو , ببيتو , حتى بحياتو العاطفية , ويصير مزاجك يا مسكين على مزاجية مستر مزاجي, يعني إذا كان مستر مزاجي مبسوط لازم ومن الضروري إنك تكون مبسوط لأنو مستر مزاجي مبسوط  وشرط لازم وكافي إن تكون مبسوط ومبين سنانك دلالة على حالة الفرح اللي لازم يحس مستر مزاجي إنك فيها من شان يكون سعيد , وإذا ماكان مستر مزاجي مبسوط ” الله يكون معك ” لازم تكون حزين ومزعوج لزعلو وإياك ثم إياك بهديك اللحظة تبين ولو بتصرف بسيط إنك مانك مزعوج عليه لأنو ساعتها الله يعينك رح تتبهدل , شنّو مستر مزاجي مزعوج وإنت لازم تمارس طقوس العزاء طول ما نك معو …

ويا ترى شو هي الأسباب اللي بتخليك غصب العنك تتحمل مستر مزاجي ؟

1- إيواااااا .. إنت سألت وأنا رح جاوب , والله شوف هي أسباب كتير منها : إنو يكون مستر مزاجي أحد أفراد عيلتك وهون ما بتقدر تعمل شي غير الصبر , لأنو الصبر هون هو المفتاح والطناش هو الحل واي ردت فعل نحو مستر مزاجي رح تتفسر أنها هجوم على مكانتو المرموقة في العائلة الكريمة

2- أنو يكون مستر مزاجي مديرك بالشغل أو بيشتغل معك بالشركة أو بالمحل اللي إنت بتشتغل فيه وهون مصيبة أكبر , يعني شلون بدك تتفاهم معو وهو أصلاً مزاجي , يعني إذا اليوم جاي المود تبعو والضحكة مبينة لورا الدينين ما في مشكلة , بيكون الشغل كلو تمام وكل المصاعب إلها حل , وروح الفريق الجماعية لازم تكون بأوجه قوتها ولازم تبين لمستر مزاجي بهل اللحظة انك مثال للعامل المجد وضحكتك ما لازنم تفارق شفايفك وهاد دليل على إنك مبسوط بالشغل وما في مشاكل اليوم أبداً وإسترجي حكي غير هيك , وإذا كان مستر مزاجي اللي بالشغل مزعوج اليوم , فأعلن يا صاحبي حالة الإستنفار القسوى وإياك و أن تتفوه بأي كلمة أو تقوم بالتعليق على أي قرار أو  أن تناقش بفكرة هي من صنعو , لأنو إنت بهل اللحظات مستهدف بأي نفس ممكن أنو يبين إنك مبسوط ومستر مزاجي مزعوج

3- إني يكون الزمن واقف ضدك وتكون حضرتك بتحب مستر مزاجي , وهون الطامة الكبرى , المشكلة إنك بتحبو يعني بالأصل العيوب عندك ما بتبين إلا بالمكبر لأني البحب ما بيشوف عيبو اللي بيحبو , بقا كيف إذا كان اللي بتحبو مستر مزاجي … تخيل معي يرعاك الله , إذا مستر مزاجي مبسوط فينك تحكي بأي موضوع رومسني عن الحب وعن الخطبة وكيف عم تخطط لشهر العسل وكيف إنك ما عم تقدر تنسى مستر مزاجي وما عم تقدر تعيش بدونو , وممكن تتناقش بالمعيشة الغالية وأنو ما يتأمن معك غرفة وصالون بهل مليون ليرة اللي معك هاد إذا كان معك ياها وتحكي شوي على أهل مستر مزاجي , كلو ما في مشكلة إذا مستر مزاجي مبسوط , أما لما بترعد الدنيا وببلش الغيم الأسود يسكر السما الزرقة , تكون مصيبة ظهرت بالأفق وبدأت حلقة النئ , بهاللحظة ما بتقدر توجه أي كلمة لمستر مزاجي لأنو معصب منك لأنك ما عايدت إمو لمستر مزاجي على عيد الأم أو لأنو فاق مستر مزاجي الصبح ولاقى حالو ما نو مبسوط , هيك بدون بسبب مانو مبسوط وبس وإنت بالتالي ما لازم تكون مبسوط , لأنو اللي بتحبو ما نو مبسوط , ولو كان ما في سبب أنو مستر مزاجي مزعوج بس إنت بدافع الحب والتضحية العمياء تجاه محبوبك مستر مزاجي من الحتمية بمكان أنك تكون مزعوج ….

4- أما الداء الأعظم والمرض العضال والعلة التي ليس لها دواء أنو يكون مستر مزاجي دكتورك بالجامعة  🙂 … , شو ممكن تعمل يا مسكين , يعني إذا جاي على بالو يعمل مذاكرة بيعمل مذاكرة وإذا جاي على بالو يقلك أنو في مذاكرة بكرا وإنت ما بتلحق تعمل شي ويجي بكرا ويكون ملتعن نفسك وإنت عم تدرس ويقلك ببساطة ” والله أنا كنت بدي إعمل مذاكرة بس غيرت رأي , اليوم بدي كفي محاضرة التواصل الفكري تبع المحاضرة السابقة !!!؟؟؟!!!!؟؟؟”, هون شو بيصير معك  … يا بدك تبلع الموضوع وتسكت وتجيك الجلطة  , يا بدك تقوم وتحكيك شي كلمة وتتقلع لبرا كونك شككت بالموضوعية تبع الدكتور وقللت من أهمية المحاضرة وناقشتو وقلتلو ” شو منشان المذاكرة ” وهون حلام بقا تنجح بالمادة إذا حط مستر مزاجي حطاك …

عليتو لقلبي والحل ؟

الحل إنك  ” ط – ن – ا ش ” طناش , لأنك إذا حاولت , حط مية خط تحت حاولت , إذا حاولت تفهم مستر مزاجي بكل الحالات ” محب او بالعمل أو بالعيلة أو شو ماكان موقعوا الإجتماعي ” أنو مزاجي , بتكون إنت بني آدم  ما بتفهم وزئقبي ولازاوردي وضد التقدم وما بتحب يكون حدى أحسن منك , وما بتحبو ” إذا كان حبيبك ” , وبتطلع بالأخير والعياذ بالله إنت المزاجي .. 🙂 , بقا لهيك إياك ثم إياك تفكر حتى تفكير بإنك تفهم هالإنسان إنو مزاجي ..أوعى ها , لا تقول ما قلتلك .. أوعى تغلط هيك غلطة

الحل الوحيد .. طنشو , إعتبروا مانو موجود , لحالو بيهدا بعد شي 10 ساعات وببلش بعدها يحاكيك على أساس أنو عم يصالحك وإنت يا حرام غشيم وما بتفهم 🙂

أما إذا إنت كنت المستر مزاجي فنصيحة أوعى  تغير طريقة تفكيرك أو أوعى تفكر تتصرف عكس مزاجيتك لأنو أنت الصح والناس كلها غلط , والله محي الثابت

ملاحظة  :

ككتابة : هذا الأسلوب أتبعه لأول مرة في تدويناتي , لا أعلم إن كان في مكانه أو يوجد فيه الشوائب ما يوجد , أحببت أن أتكلم بحرية , أن أعبر عن حالة امر بها مع الناس كل يوم , أن أتكلم عن المزاجية , ربما أحتاج إلى مئة صفحة  للتحدث , أن تكون بحاجة للتعامل مع إناس مزاجيين كل يوم , أمر يكاد لا يحتمل , ليس من واجبات أي إنسان أن يتحمّل مزاجية غيره , أخي المزاجي , إختي المزاجية : رجاءاً دعوا مزاجيتكم في صندوق وأحكموا الإغلاق عليها , لأنها ستجعكم وحيدين يوماً ما …

8 thoughts on “مستر مزاجي

  1. عن جد معاناة , كتير من الأوقات لازم تساير مستر مزاجي , بس في أوقات , بيطلع خلقك على أبو مستر مزاجي … 🙂 ,

    تدوينة رائعة كتير عزيزي , كل الشكر والتحية 🙂 .

    أدهم

  2. أخ شو بدي قلك
    ألي بعد العصي مو متل ألي بياكلا
    حسيتك عم تحكي عني وكأنك بتعرفني تمام
    طبعا مو انا المزاجي
    بس أسلوب الطناش غير نافع أبدا مع المزاجيين
    ما بعرف شو حتقول لما قلك أنو مزاجي هلق مو رايق عالكتابة بس رح ارجع مر لعندك لعلق بمزاج حلو لأني عم اتعامل مع امبراطور بالمزاجية

  3. في الحقيقة جذبني العنوان
    كوني أتعامل مع مزاجيّة أحدهم يوميا 🙂

    ويقال أن مثل هذه الحالة ناتجه أساساً من عدم تقديرالشخص لذاته ….!
    على أن المزاجية داء يعاني منه جلّنا إن لم يكن كلنا
    لكنها تتفاوت من شخصٍ لأخر
    مثلها مثل أي غريزة او خصلة
    والمزاجية الطبيعية هي تلك التي تنتج كردة فعل وهي مؤقته جدا
    هذا من وجهة نظر خاصة ,

    نستطيع تفهم مرور أحدهم بحالة معينة لمدة ما , إلا أن تفسيره لكل مشاكلة مع الآخرين وعدم استطاعته التواصل مع أفراح أو أحزان من حوله بالمزاجية ,, حاجة بقا

    تدوينة وطرح جميل
    تحياتي

  4. مع اني ما بقرأ بالعادة التدوينات الطويلة بس والله حبيت يلي كتبتيه كتير اكيد كنت متضايقة كتير لانو حسيت بها الشي وقت قرات الكلمات ممتاز زجدت متنفس لمشاكلك الله يعطيكي العافية
    تحياتي

  5. رائئئئئئئئئئئئئئئئئئئئئئئئئئئئئئئعة بكل المقاييس
    حكيت بالعامية بالفصحى المهم إنك حكيت شي واقعي ولامسني
    هلق بدك الصراحة أنا مزاجية للعضم بس والله بحاول ما دايق الي حواليي
    بحاول لما حس حالي فايقة مدايقة مو طايقة شوف حدا بعد عن الناس الي بعرف إنون ما بيتحملوا
    هي باللنسبة لإلي
    أما بالنسبة لرفقاتي فعند شي رفيقتين فيهون هالطبع بس والله أنا ملاك قدامون
    و اتفقت أنا وياهون على أسلوب الابتعاد الضروري عن بعض بمتل هيك مراحل
    وبالشغل الله يهونا عالجميع صعب يكون مديرك مزاجي
    والمشكلة الأكبر إنو عواطفو بتتغير حسب مزاجيتو يعني يوم يحبني يوم يكرهني ومو طايقني
    بس على فكرة المزاجية بس بدها شوية فهم من الناس إنو الإنسان بيمر أحياناً بقصص بتخلي يعصب و غصب عنو يصير مزاجي ظروف حياتنا مو ثابتة
    بعتذر عالإطالة بس الموضوع ألهمني كتير و لأنو عنجد عم يحكي عني
    ما فيني قلك غير إنو رائع وكتير حبيت

  6. ممتاز …. انا هيك وصلت لنتيجة أنو رأيي بهالموضوع صائب …. وتماما معك حق التطنيش أفضل وسيلة لمجابهة المزاجي …. لأنو أساسا المزاجي حساس بس بطريقة سلبية لهيك التجاهل رح يجننه ورح يرجعه لحالته البشرية الطبيعية
    بس عن جد مصيبة كبيرة اذا كان مديرك بالعمل مزاجي …. اسألني أنا
    سلامي لك

  7. ومفكرين التطنيش سهل ؟

    التنطيش بدون طولة بال كتير كبيرة … التطنيش بدو تشغل فكرك بغير اللي عم يصير حواليك … بصراحة في امور ممكن نطنش عنها مهما ظهرت بتواتر عالي … لكن في امور ما ممكن ابدا نطنش عنها لانها بتكون عم تؤذي شيء بداخلنا

    ربما يكون هذا تعليقي الأول بمدونتك … وسرني كثيراً وجود رابط لمدونتي عندك … اشكرك

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s